Doğum tarixi yaxınlaşdıqca anaları düşündürən məsələlərdən biri də doğum çantasıdır.

Analıq çantasını hazırlamaq üçün ideal vaxt hamiləliyin 32-ci həftəsindən başlamaqdır. Ancaq bu tarix hər hamilə qadın üçün fərqli ola bilər, çünki bəziləri vaxtından əvvəl doğuş riski altındadır, digərləri isə gec doğula bilər. Odur ki, hamiləliyin gedişatını və həkiminizin tövsiyələrini nəzərə alaraq, doğum çantasının hazırlanma vaxtını müəyyən etmək daha məqsədəuyğun olardı.

Erkən hazırlaşmaq, gözlənilməz hadisələrə qarşı hərəkətə keçməyə imkan verə bilər. Həmçinin, doğum çantasını erkən hazırlamaqla, diqqətinizi doğum prosesinə cəmləyə və son dəqiqə tələskənliyindən xilas ola bilərsiniz.

Doğum çantasını hazırlayarkən, doğum edəcəyiniz xəstəxananın siyasətini və imkanlarını da nəzərə almaq vacibdir. Bəzi xəstəxanalar əsas ehtiyacları təmin edir, digərləri isə daha çox şəxsi əşyalar gətirməyinizi tələb edə bilər. Buna görə də, xəstəxanaya müraciət etmək və doğum çantası hazırlayarkən nə tələb olunduğunu öyrənmək yaxşıdır.

Unudulmaması lazım olan digər vacib məqam da doğum çantası hazırlanarkən ana və körpənin ehtiyaclarını nəzərə almaq və çantadakı əşyaların düzgün və tam olmasına diqqət yetirməkdir.

Sizin üçün doğum çantasında olması mütləq əşyaları topladıq.

Ana üçün hazırlanmış doğum çantası;

• Hamiləlik sənədi və sağlamlıq kartı
• Xəstəxana sənədləri
• Gigiyenik ped
• 5-10 ədəd alt paltarı, ev ayaqqabısı
• Corab
• Asan əmizdirmə üçün bir neçə cüt pijama və ya gecə paltarı
• Şal/xələt
• Bir neçə dəsmal
• Xəstəxanadan çıxarkən geyinmək üçün rahat paltar
• Çantaya şəxsi qulluq vasitələri daxil edilməlidir. Bunlardan başqa maraq sahəsinə uyğun olaraq kamera, kitab, musiqi dinləmək üçün cihaz kimi avadanlıqlar əlavə oluna bilər ki, bu da ananı rahatlaşdıracaq və xəstəxanada vaxt keçirməyi asanlaşdıracaq.
• Şarj cihazı
• Süd vermə məhsulları
• Adyal, istəyə görə yastıq

Körpə üçün hazırladığınız xəstəxana çantasın;

• Kombinezon
• Çıt-çıtlı body
• Əlcəklər, zıbın, jiletlər və ya kardiqanlar
• Corab
• Hamam dəsmal
• Papaq
• Mövsümə uyğun qalınlıqda yorğan
• Butulka və əmzik
• Bez dəyişmə dəsmalı
• Uşaq bezi
• Nəm salfetlər
• Uşaq pudrası
• Uşaq şampunu unutmamalı olduğunuz şeydir.

Doğum çantanızı hazırladıqdan sonra asanlıqla çata biləcəyiniz yerə qoysanız, doğum həyəcanı ilə çantanı unutmanın qarşısını almış olarsınız. Gün ərzində ağlınıza gələn materialları siyahınıza əlavə edib çantanızı sizə özəl edə bilər və çantanız tamamlandıqdan sonra körpənizlə görüşəcəyiniz o gözəl günü gözləməyə başlaya bilərsiniz 🙂