Əvəlik – dünyanın müxtəlif yerlərində xalq təbabətinində istifadə olunan inanılmaz faydalı bitkidir. Bu ot eyni zamanda yeməklərdə də istifadə olunur. Avropada əvəliyi həm ayrıca yemək kimi bişirirlər, həm də raquya əlavə edirlər, slavyan xalqları bu bitkidən borşun bir növünü hazırlayırlar. Bizdə isə əvəlik çox dadlı, faydalı və zəngin şorbaların bir hissəsidir.

Tərkibi:
- 1 bağlama əvəlik
- 60 qr alça qurusu
- 100 qr qaragöz lobya
- 100 qr kərə yağı
- 200 qr un
- 1 stəkan su
- 1 ədəd orta boy soğan
- bulyon
- sarıkök
- duz

Hazırlanması:
Lobya öncədən isladılıb, qaynadılaraq bişirilir. Əvəlik doğranılıb, ayrıca qabda qaynadılır. Orta qabda un su ilə umac halını alanadək qarışdırılır. Bu arada soğan da incə-incə doğranılır və yağda qovrulur. Soğan qızılı rəngə döndükdən sonra üzərinə bulyon, bişmiş lobya və əvəlik əlavə edilir, qarışdırılıb bişməyə qoyulur. Şorba qaynamağa başlayanda qarışdırılaraq umac əlavə edilir, ədviyyatlar səpilib bişirilir.

Məsləhət:
Əvəliyi bişirməzdən əvvəl yaxşıca yuyun. Bu bitkini tpyuq şorbasına əlavə etsəniz soyuqdəyməni müalicəsi üçün çox faydalı bir vasitə əldə etmiş olarsınız. Umacın əvəzinə əriştə də istifadə edə bilərsiniz.