Paytaxtımızın adını daşıyan bu qurabiyə Sovet zamanından bu günədək ən məşhur şirniyyatlardandır. Ağızda əriyən qum kimi xəfif peçenye yüngül tərkibinə görə həm uşaqlar, həm böyüklər tərəfindən sevilir.

Tərkibi:
Xəmir üçün:
- 650 qr un
- 500 qr kərə yağı
- 250 qr şəkər pudrası
- 3 ədəd yumurtanın ağı

Üzəri üçün:
- alma cemi

Hazırlanması:
Kərə yağı otaq temperaturunda yumşaldılır, şəkər pudrası ilə ağ rəngə dönənədək mikserlə qarışdırılır, yumurta ağı əlavə edilir. Un hissə-hissə ələkdən ələnir, tam həll olnadək qarışdırılır. Yaxıntılı konsistensiyanı alan hazır xəmir şirniyyat torbasına yığılır və bişirmə kağızının üzərinə çiçək formasında çökdürülür. Tən ortası barmaqla yastılanıb alma cemi əlavə edilir, sobada 160 dərəcədə 15-20 dəqiqə bişirilir.

Məsləhət:
Qurabiyənin klassik forması çiçək, balıqqulağı və çubuq şəkilli olsa da, siz öz zövqünüzə uyğun həm formanı, həm də üzərinə qoyulan cemi dəyişə bilərsiniz. Müxtəlif meyvələrin cemini istifadə etməyiniz mümkündür.