Lənkəranın balıq ləvəngisi Azərbaycan mətbəxinin ən gözəl nümunələrindəndir. Ən ləzzətli ləvəngi yalnız Xəzər dənizindən tutulan kütüm balığından bişirilir.

Tərkibi:
- 1 ədəd kütüm balığı
- 500 qr qırmızı soğan
- 400 qr qoz
- 300 qr alça əzməsi
- 150 qr kərə yağı
- duz, istiot

Hazırlanması:
Balığın pulcuqları təmizlənir, içalatı çıxarılır, yaxşıca yuyulub, qurulanır. İçinə və üstünə duz və istiot vurulur.
Soğan ət çəkən maşınından keçirilir, suyu sıxılaraq çıxarılır. Qoz üyüdülür, soğanla birlikdə qarışdırılır. Alça əzməsi, zövqə görə duz və istiot əlavə edilərək, içlik balığın içərisinə doldurulur. Sobada 180 dərəcədə 30-40 dəqiqə bişirilir.

Məsləhət: Əgər balığın kürüsü varsa, onu atmayın. Kürünü içliyə əlavə edərək ləvəngini bişirə bilərsiniz. Adətən ləvənginin yanında bütün balıq yeməklərində olduğu kimi, narşərab təqdim edilir.