Dovğa süd məhsulları tərkibli şorbalar qrupuna aiddir, bu cür reseptlərə müxtəlif mədəniyyətlərdə rast gəlinsə də, bu yeməklərin hər biri özünəməxsusluğu ilə fərqlənir. Bəzi yerlərdə belə şorbalar bişirilməmiş qatıqla və ya qatığa bənzər məhsulla hazırlanır, beləliklə, alınan yemək milli yeməklərimizdən ovduxa və ya slavyan mətbəxinin okroşkasına bənzəyir. Türkiyədə yayla və toyqa, İranda Ərdəbil şorbası kimi tanınan, dovğaya bənzər yeməklərə rast gəlmək olar.

Tərkibi:
- 1 litr qatıq
- 1 ədəd yumurta
- 50 qr un
- 80 qr yumru düyü
- 100 qr noxud
- 2 dəstə ispanaq
- 2 dəstə keşniş
- 1 dəstə şüyüd
- 1 dəstə dağ keşnişi
- 1 dəstə nanə
- duz

Hazırlanma qaydası:
Noxud öncədən üzəri su ilə örtüləcək şəkildə isladılır və bişirilir. Bu arada göyərtilər yaxşıca yuyulur, incə şəkildə bir qaba doğranılır. Başqa bir qabda qatıq, un və yumurta tək məhlul halını alanadək qarışdırılır, yumru düyü yuyulub əlavə edilir və vam odun üzərinə qoyulur. Yavaş-yavaş qarışdırılır. Qaynamağa başladıqda qazana göyərti və bişmiş noxud əlavə edilir. Bişdikdən sonra altı söndürülür və duz əlavə edilir.

Məsləhət:
Dovğa ocağın üstündə ikən mütəmadi qarışdırılmalıdır. Qatığın üzərində qaynamağa başladığının xəbərçisi olan balaca köpüklər əmələ gəldikdə göyərti əlavə edilə bilər.