Heyva dolmasının Naxçıvan mətbəxinə mənsub olmasına baxmayaraq bu yeməyə Bakıda da rast gəlmək olar. Heyva dolması həm də Türkiyə, Orta Asiya kimi regionlarda da bişirilir, buna görə bu yeməyi türkdilli xalqların mirası saymaq olar.
Heyva dolması qulağa nə qədər qəribə səslənsə də, bu yeməyi mütləq dadmalısınız.

Tərkibi:
- 4 ədəd heyva
- 2 ədəd orta ölçülü soğan
- 400 qr quzu əti
- 100 qr boranı tumu
- 200 qr şabalıd
- 70 qr kərə yağı
- 1 dəstə şüyüd
- duz, istiot

Hazırlanması:
Heyvalar təmiz yuyulur. İçləri oyulub təmizlənir, üzərini örtəcək qədər isti suda saxlanılır.
Bu arada quzu əti qiymə halına salınır və ya quşbaşı doğranılır. Yağlı tavada qovrulur, üzərinə təmizlənmiş şabalıd, doğranmış soğan əlavə edilib qarışdırılır. Boranı tumu, incə doğranmış şüyüd və zövqə görə duz, istiot əlavə etdikdən sonra heyvalar sudan çıxarılıb, suyu alınır. İçləri hazırlanmış qarışımla doldurulur.
Üzərinə azca su əlavə edilib, heyvalar yumşalanadək bişirilir.

Məsləhət:
Quzu əti yerinə toyuq və ya hinduşka filesi də istifadə edə bilərsiniz. Bu yeməyin tərkibində düyü və noxud da istifadə edə bilərsiniz. Həmçinin, bəzi yerlərdə servis etməzdən öncə heyvaların üzərinə bal gəzdirilir, siz də bu üsulu yoxlaya bilərsiniz.