Azərbaycanın şimal-qərb bölgəsinin ənənəvi yeməyi olan maxara iri blinçiki xatırladır. Maxara qədim zamanlarda dünyanın müxtəlif xalqları tərəfindən sitayiş edilən günəşi simvolizə edir. Buna görə də bu yeməyin bizə bütpərəstlik dövründən gəldiyini əminliklə söyləmək olar.

Tərkibi:
- 1 litr süd
- 2 ədəd yumurta
- 4 yemək qaşığı şəkər tozu
- 20 qram kərə yağı
- 400 qram un
- zövqə görə duz

Hazırlanması:
Yumurta ilə şəkər qarışdırıldıqdan sonra sıra ilə süd, un və zövqə görə duz əlavə edilir. Bütün inqrediyentlər tam şəkildə həll olunana və məhlul bir az qatı forma alanadək qarışdırılır.
Ocağın üstündə öncədən isidilmiş sacın üzərinə çömçə ilə məhlul yayılır (elektrik sacı da ola bilər).
Məhlulun qıraqları axaraq günəş formasını alacaq - beləliklə, maxaranın özünəməxsus görünüşü yaranacaq.
Bişmiş hər bir maxara yuxası kərə yağı ilə yağlanıb, üst-üstə səliqə ilə yığılır.
Zövqə görə üzərinə şəkər tozu və ya şəkər pudrası səpilə bilər.

Məsləhət:
Adətən çöl şəraitində bişirilən maxaranı evdə də bişirmək mümkündür. Bu halda sacı qaz piltəsinin üstündə tərsinə çevirərək maxaranı hazırlaya bilərsiniz. Bu dadlı yemək səhər süfrələrinin bəzəyidir.
Təqdim edərkən üzərinə şəkər pudrası səpə bilərsiniz.