Piti Şəki mətbəxinin, demək olar ki, ən məşhur yeməklərindəndir. Şəkidə bu yemək mütləq dəni və bulyonu ayrı olmaqla yeyilir. Pitinin düzgün hazırlanma qaydalarından biri də saxsı qabda bişirilməsidir.

Tərkibi:

- 500 qr sümüksüz quzu əti
- 200 qr quyruq
- 150 qr noxud
- 150 qr şabalıd
- 100 qr albuxara
- 2 ədəd orta ölçülü soğan
- zəfəran
- qırmızı soğan
- sumax
- duz, istiot

Hazırlanması:
Noxud öncədən yumşalıb daha yaxşı bişməsi üçün isladılır. Quzu əti orta ölçüdə parçalar ayrılır. Noxudun suyu süzülür, saxsı qabın içinə yığılır. Üzərinə tikələnmiş ət yığılır, bulyon və ya su süzülüb, vam odda bişməyə qoyulur. Bir az sonra narın doğranmış soğan əlavə edilir və qaynamağa başladıqdan sonra təmizlənmiş şabalıd, albuxara, zəfəran əlavə edilir, zövqə görə duz və istiot səpilir. 2-3 saat vam odda bişirilir.

Məsləhət:
İstəyinizə uyğun pitiyə balaca kartof da əlavə edə bilərsiniz. Piti servis edilərkən yanında mütləq üzərinə sumax səpilmiş, doğranmış qırmızı soğan verilir.