Milli mətbəximizə mənsub qoğal əsasən Novruz bayramının rəmzlərindən biri sayılır. Ətirli ədviyyatlardan hazırlanmış içliyi ona xüsusi dad və doyumluluq verir. Bəzi bölgələrdə qoğal şorbaların yanında çörək əvəzi süfrəyə servis edilir.

Tərkibi:
Xəmir üçün:
- 1 kq un
- 400 ml süd
- 50 qr kərə yağı
- 50 qr duru yağ
- 10 qr şəkər tozu
- 12 qr maya
- 20 qr duz
- 1 ədəd yumurta
- sarıkök

İçlik üçün:
- 150 qr un
- 50 qr kərə yağı
- 1 çay qaşığı cirə tozumu
- 1 çay qaşığı razyana
- 1/2 çay qaşığı sarıkök
- duz, istiot

Üzəri üçün:
- 1 ədəd yumurtanın sarısı
- çörəkotu

Hazırlanması:
İlıq süd, maya və şəkər tozu ilə qarışdırılıb mayalanması üçün kənarda isti bir yerdə saxlanılır. Daha sonra xəmir üçün bütün inqrediyentlər geniş bir qabda mayalanmış süd əlavə edilrək qarışdırılır. Ələ yapışmayacaq yumşaqlıqda yoğrulan xəmir acıması üçün 1 saata yaxın gözlədilir.
Bu arada içliyin ərzaqları bir qaba əlavə edilərək qarışdırılır, ocağın üzərində rəngi dəyişənədək qovrulur. Mayalanmış xəmir 7 eyni ölçüdə kündəyə ayrılır və 10-15 dəqiqə dinləndirilir. Orta ölçülü bir qabda kərə yağı əridilir, kündələr yayılıb nazik yuxa halına salınır və hər qatın üzərinə əridilmiş kərə yağı çəkilir. Beləliklə, bütün yuxalar üst-üstə açılır, sonuncu kündə yayılıb yağlandıqdan sonra üzərinə içlik səpilir və rulet şəklində bükülür. Bükülmüş xəmir ruleti eyni ölçüdə hissələrə kəsilir, əl ilə azca yayılaraq yastı qoğal şəkli verilir. Üzərinə fırça ilə yumurta sarısı çəkilir, çörəkotu səpilir və sobada 200 dərəcədə qızılı rəng alanadək bişirilir.

Məsləhət:
Qoğalların ölçüsünü ruleti bölərkən qərarlaşdıra bilərsiniz və nisbətən kiçik və ya böyük ölçülər hazırlaya bilərsiniz.