Rizə küftə, başqa adla Rza küftə Azərbaycan mətbəxinin milli yeməklərindəndir. Bu yemək həmçinin, soydaşlarımızın yaşadığı müasir İran ərazisində də çox məşhurdur.

Tərkibi:
- 250 qr dana əti qiyməsi
- 250 qr quzu əti qiyməsi
- 150 qr pomidor
- 70 qr kərə yağı
- 2 ədəd orta ölçülü soğan
- 10 qr darçın tozu
- 1 dəstə keşniş
- duz, istiot

Hazırlanması:
Quzu əti və dana ətinin qiymmələri bir qabda narın doğranmış 1 ədəd soğan və duzla qarışdırılıb, balaca küftələrə bölünür. Küftələr soyuduca yerləşdirilib, bərkiməsi üçün bir az saxlanılır.
Digər soğan kub şəklində doğranılır, yağda qızardılır. Pomidorun qabığı soyulub, kiçik doğranılır və əlavə edilir. Sous kimi yarı qatı, yarı axar hala salınır. Darçın, zövqə görə duz və istiot, küftələr əlavə edilib, birlikdə bişirilir. Servis edərkən üzərinə incə doğranmış keşniş səpə bilərsiniz.

Məsləhət:
Zövqə görə su ilə qarışdırılmış limon suyu və ya abqora əlavə edə bilərsiniz (sirkə əvəzinə istifadə edilən yetişməmiş üzümün şirəsi).
Rizə küftə ayrılıqda yemək kimi və ya plovun yanında əlavə kimi təqdim edilə bilər.