Azərbaycan mətbəxinin unudulmuş yeməyi şəşəndaz Abşeron bölgəsinə aiddir. Keçmişdə zadəgan ailələrin evlərində bişirilirmiş. Bu yemək qış vaxtının sevilənlərindən olaraq əsasən aşın yanında qara kimi təqdim olunurmış.

Tərkibi:
- 250 qr uzun düyü
- 100 qr yağ
- 15 qr şəkər tozu
- 2 ədəd yumurta
- 1 ədəd orta boy soğan
- limon duzu
- zəfəran
- darçın
- duz, istiot

Hazırlanması:
Uzun düyü öncədən 30 dəqiqə isladılır, duz əlavə edilərək qaynadılır. Suyu süzülüb dəmə qoyulur.
Düyü dəmlənərkən yağlı tavada incə doğranmış soğan qızardılır, üzərinə ədviyyatlar əlavə edilib qarışdırılır. Kasada çəngəl ilə çırpılmış yumurtalar tavaya əlavə edilir və bütün inqrediyentlər birlikdə bişirilir.
Şəşəndaz, ətri çıxanadək dəmlənən düyünün üzərində servis edilir.

Məsləhət:
Bəzi yerlərdə şəşəndaza ət, abqora kimi turşaşirin souslar və turş giləmeyvələrin əzməsi əlavə edilir, yeməyin bu variantları da çox dadlıdır.
Zövqünüzə görə ədviyyatları da azalda və ya çoxalda bilərsiniz.