Hər bir azərbaycanlının tanıdığı və sevdiyi, milli mətbəximizin və şənlik süfrələrinin əsl şahı - Şah plov. Bu cür bişirmə texnologiyası əsrlər boyu insanlara məlum olsa da, bizim bildiyimiz formada şah plov məşhur aşpaz Şahhüseyn Kərimovun sayəsində yenidən bayram süfrələrinə qayıtmışdır. Elə həmin vaxtdan bu yemək müasir toyların və tədbirlərin dəyişməz atributu olmuşdur.

Tərkibi:
- 300 qr uzun düyü
- 300 qr sümüksüz quzu əti
- 2 orta ölçülü soğan
- 150 qr şabalıd
- 150 qr kərə yağı
- 150 qr albuxara
- 100 qr qayısı
- 20 ədəd yumru lavaş
- bir ovucdan az kişmiş
- zəfəran
- duz

Hazırlanması:
Uzun düyü öncədən bir qabda isladılır. Bu arada şabalıd təmizlənir. Quzu əti kiçik ölçüdə, soğanlar isə tən ortadan bölünərək, yarım halqa şəklində incə doğranılır. Düyü qazanda qaynadılır, tam bişmədən ocaqdan götürülür və suyu süzülür.
Tavaya yağ əlavə edilir, doğranmış quzu əti bir az qovrulduqdan sonra üzərinə şabalıd, qayısı, albuxara, kişmiş və soğan əlavə edilir, bütün inqrediyentlər yarı-bişmiş hala gələnədək qovrulur.
Qazan yaxşıca yağlanır, içərisinə lavaşlar qazanın divarlarını və dibini örtəcək şəkildə sərilir. Düyü iki hissəyə ayırılır, bir hissəsi qazana boşaldılır. Üzərinə tavada qovrulan inqrediyentlər əlavə edilib, düyünün ikinci hissəsi bərabər şəkildə yayılır. Lavaşlarla düyünün üzəri bağlanır, yağlanıb sobada 170 dərəcədə 40-60 dəqiqə bişirilir.

Məsləhət:
Şah plov yemək növündən çox bişirmə texnikasıdır, buna görə içərisinə əlavə etdiyiniz məhsullar fərqli ola bilər, onları öz damaq zövqünüzə uyğun dəyişə bilərsiniz. Məsələn, toyuq və gilənar qurusu ilə hazırlanan şah plov da çox ləzzətlidir.