Tünbəki tez-tez "Tünbəki dolması" adlandırılan qədim Azərbaycan yeməyidir. Müasir dövrdə çox az tanındığından sizinlə bu maraqlı resepti paylaşmaq qərarına gəldik. Əminik ki, mütləq bəyənib istifadə edəcəksiniz.

Tərkibi:
- 1 kq sümüksüz mal əti
- 500 qr yumru düyü
- 150 qr şabalıd
- 80 qr kərə yağı
- 2 ədəd orta ölçülü soğan
- 1 dəstə şüyüd
- quru nanə
- duz, istiot

Hazırlanması:
Mal əti bərabər dilimlərə ayrılır, tam yumşaq hala gələnədək döyülür, duz və istiot səpilir. Bir az dinləndirilir, bu arada isə başqa bir qaba təmizlənmiş şabalıd, şüyüd və soğan narın doğranılır, yumru düyü əlavə edilir, quru nanə səpilib qarışdırılır. Bu qarışım döyülmüş mal əti dilimlərinin üzərinə qoyulur və dilimlər bükülür. Hazırlanmış dolmalar saxsı bir qaba səliqə ilə yerləşdirilib, yanına heyva əlavə edilir. Üzərinə bir az su süzülüb sobada və ya qazda 40-50 dəqiqə bişirilir.

Məsləhət:
Mal ətinin yerinə toyuq və ya hinduşka filesi istifadə edə bilərsiniz. Həmçinin, yeməyi qazda bişirib, isti sobada bir az gözlədə bilərsiniz.