Umac - türkdilli xalqlarda çox sevilən şorba növlərindən biridir. Tatarstanda, Türkiyədə, Azərbaycanın müxtəlif bölgələrində bu yeməyə rast gələ bilərsiniz. Başqa adlar altında bu yeməyə öncədən türk təsirinin olduğu regionlarda rast gəlmək olar. Məsələn, Rusiyada umaca bənzər, qədimdə kəndlilərin hazırladığı "zatiruxa" şorbası var.

Tərkibi:
- 200 qr un
- 70 qr kərə yağı
- 1 ədəd yumurta
- 1 ədəd orta ölçülü soğan
- 1 stəkan su
- bulyon
- zəfəran
- nanə qurusu
- duz, istiot

Hazırlanması:
İlk öncə un az miqdarda su ilə umac halına salınır və qurumağa qoyulur. Ardınca incə doğranmış soğan yağda qovrulur, üzərinə bulyon süzülüb, zəfəran əlavə edilir. Şorba qaynamağa başladıqda umac əlavə edilir. Sonda yumurta çırpılaraq əlavə edilir və qarışdırılır, zövqə görə duz və istiot səpilir. Servis edilərkən üzərinə azca nanə qurusu səpilə bilər.

Məsləhət:
Türkiyədə bu yeməyin, mayasız xəmir xırda-xırda çimdiklənərək və şorbaya əlavə edilərək hazırlanan üsulu var. Şorbanın bu növü həqiqətən çox dadlı alınır. Acı sevirsinizsə umaca paprika və ya üyüdülmüş çili bibəri əlavə edə bilərsiniz. Beləliklə, özünüzü soyuqdəymədən qorumuş olacaqsınız.