Mayın 15-də Bakı Ekspo Mərkəzində sayca 17-ci Azərbaycan Beynəlxalq Kənd Təsərrüfatı Sərgisi (“Caspian Agro”) və 29-cu Azərbaycan Beynəlxalq Qida Sənayesi Sərgisinin (“InterFood Azerbaijan”) açılışı oldu. Sərgidə 38 ölkədən 500-ə yaxın şirkətin iştirakı ilə rekord sayda milli və regional stendlərin nümayişi baş tutdu. Sərgini Azərbaycanın müxtəlif dövlət və şirkət nümayəndələri, yüzlərlərlə qonaq ziyarət etdi. 

Sərgidə həmçinin Ümumdünya Aşpazlar Cəmiyyətləri Assosiasiyasının tərəfdaşlığı (“Wordlchefs”) ilə Azərbaycan Kulinariya Mütəxəssisləri Assosiasiyası (ACSA) tərəfindən təşkil olunan, dahi Azərbaycan aşpazı Şahhüseyn Kərimovun şərəfinə “Qızıl Şah” Milli Azərbaycan Mətbəxi çempionatı keçirildi. Ənənəvi olaraq bu il də çempionatın  əsas tərəfdaşlarından biri “Bazarstore” oldu. Minlərlə ziyarətçi sərgi zalında qurulan “Bazarstore” mağazasını ziyarət edib, fəaliyyəti ilə ətraflı maraqlanmışdır. Həmçinin xarici şirkətlərin nümayəndələri ilə görüşlər keçirilib, onlar tərəfindən edilən məhsul təklifləri dəyərləndirilmişdir.

Qeyd edək ki, 2011-ci ildə “Azərsun Holdinq”in tərkibində yaradılan “Bazarstore” 13 ildir davamlı olaraq təzəlik, keyfiyyət, münasib qiymət, çeşidlilik və xidmətindən güzəştə getməyərək 93 mağazası ilə ildə 45 milyon müştəriyə, ölkə üzrə 110 min kvadrat metr-dən artıq satış sahəsində, 3700-ə yaxın çalışanı ilə xidmət göstərir.

“Bazarstore” əsas prinsiplərində qeyd olunduğu kimi bu üstün xidmət üçün əl-ələ verib birlikdə güclənməyin, inkişaf üçün davamlı çalışmağın, müştərini sərvəti bilib sözündə etibarlı olmağın və məsuliyyətinin fərqindədir.