6 aylıq bir uşaq üçün qidalanma ana südü və ya formul südü ilə başlayır. Bu dövrdə əlavə qidaya keçid etməyə başlaya bilərsiniz. Amma nəzərə almalısınız ki, bu dövrdə əlavə qida doyumluq yox, dadımlıqdır.

1. Hələ də, körpənizin əsas qidası ana südü və ya formul süd olacaqdır. Ona görə də, hər zamankı qaydada qidalanmasına davam etməlisiniz. İmtina etmə riskini azaltmaq üçün əlavə qidanı süddən əvvəl verə bilərsiniz.

2. Bir bəslənmə üçün ən çox 6 çay qaşığı qədər əlavə qida verilməlidir. Çox verildikdə qəbizliyə səbəb ola bilər. 

3. Dadıma tərəvəzlərlə başlamağınız məsləhətdir. Çünki, meyvənin şirin dadını alan körpə tərəvəz yemək istəməyəcəkdir. Nəzərə alsaq ki, yeməklər tərəvəzlərdən hazırlanır, bol vitaminli tərəvəzlərdən imtina etməsi işinizi çətinləşdirəcək.

4. 3 gün qaydasını əsas götürərək əlavə qida verməlisiniz. Verdiyiniz hər yeni qidanı 3 gün təkrarlamalı, bu müddət ərzində körpədə hər hansı dəyişiklik olub-olmadığını izləməlisiniz. Bu qayda allergiya riski üçün çox vacibdir. 

5. Gün ərzində az miqdarda su verməyə başlaya bilərsiniz. Amma verməsəniz belə, süd suyu əvəz edəcəkdir.  

Hər uşaq fərqlidir, buna görə də uşağınızın reaksiyalarını izləmək vacibdir. Əgər xüsusi bir vəziyyətiniz və ya narahatlığınız varsa, pediatrla məsləhətləşməyiniz yaxşı olar.

Əlavə qida reseptləri üçün növbəti blog yazılarımıza göz gəzdirə bilərsiniz.